जनमुक्ति खबर , बाग्मती व्यूराे ।
तीन वर्ष अघि नेपाली विशेषतामा माैलिक अधिकार सहित जनताका मागहरु पूरा गर्न नसकेको भन्दै महावीर नेतृत्वमा रहेको संसद विरोधी पार्टी नेपाल कम्युनिस्ट पार्टी ( माओवादी ) विभिन्न संघर्षका कामहरु गर्दै आइरहेको छ । तथापि पार्टी कामकाे सिलसिलामा यदाकदा पार्टी भित्र छद्म संसाेधनवाद र अवसरवादी तप्काले पार्टी र जनमानसमा विभिन्न गतिविधि गरिरहेकाले त्यस्ता नेता कार्यकर्तालाई स्पष्टीकरण साेध्ने , सच्चिन अनुरोध गर्ने र पार्टी निति विपरीत गए निस्कासन सम्म गर्ने गरेको केन्द्रीय कार्यालय सचिव निसानले जनमुक्ति खबरलाई बताएका छन् ।
कार्तिक १८ र १९ गते बसेकाे केन्द्रीय समितिकाे बैठकले पार्टी निति र विधि विपरीत गम्भीर प्रकृतिका कमजोरीहरु गरेकाले पार्टीका केन्द्रीय सदस्य प्रविण मिश्र ( मनिष ) र अर्का केन्द्रीय सदस्य हृदय बाेगटी ( हृदय ) लाई साधारण सदस्य समेत नरहने गरि कारबाही गरेको जनाएको छ । केन्द्रीय कार्यालय सचिवकाे हस्ताक्षरित विज्ञप्तिमा सम्पूर्ण पार्टी पंक्ति र जनसमुदायलाई जानकारीका निम्ति प्रेस नाेट जारी गरेको भनिएको छ ।
